Lengua Guarani

Lengua Guarani
Ára Pyahu

miércoles, 12 de abril de 2017

ARAPOKÔINDY MARANGATU - SEMANA SANTA

ARAPOKÔINDY MARANGATU – SEMANA SANTA
Ohai: David Galeano Olivera
I
Aníke repyrû hatâ
Aníke resapukái
Aníke netie'ŷ
Aníke repopo
Cháke umi mba'e rejapórô
Rejukajeýta Hesukiritópe,
Péicha he'íjepi
Ñande ru ha ñande sy
Arapokôindy Marangatu
-Ja'éva Semana Santa-
Pukukue javeve.



II
Pindo arateîme
Ha'éva domingo de ramos
Pindomimi ñande pópe
Jahapaite tupâópe
Jaromandu'a haĝua
Hesukirito jeike
Táva Jerusalén-me
Chavurromi ape ári.
Upe ñembo'eguasúpe
Jahupipávo yvate
Pa'i omongarai
Pindo jagueraháva
Ha'ânga opaichaguáva.

III
Upéingo jahupyty
Ararundy marangatu
Ha'éva miércoles santo
Iko'êmívo upe ára
Oîma kuimba'e
Ohóva jepe'avápe
Ha ogapýpe oñepyrû
Tembi'ueta apomi.
Upéicha avei oîma
Tatakuápe ojatapýva.
Kuña ha kuimba'e
Imitâ térâ kakuaáva
Ombojehe'a kyre'ŷ
Avati ha aramirô
Ryguasu rupi'a ha kamby
Ñandy, kesu ha ani
Ha ojapóma Chipa
Ijapu'áva, lopi térâ jakare
Avatigui, aramirô ha ojehe'áva
Avei kandói ha mbokaja,
Oñemboguapýva upéi
Pakova roguemimi ári
Ha oñemoingéma tatakuápe
Heseve oike avei
Sópa ha chipa guasu,
Vaka ha kure ro'o
Ha avei ryguasumi
Péicha oñondive ha vy'ápe
Oiko tembi'u apo.
Sapy'ami rire
Osêmakatu tatakuágui
Chipa hyakuâ asy ha
Hetereíva.
Opavavénte oñemboja
Ha oiporavo peteî
Ha ojopýma chupe
Kojói aku porâre.

IV
Arapo marangatúpe
Jueves santo ja'éva
Maymave ñañomoirû
Ha jasako'i jekupytýpe
Karu guasu asajegua
Upe aravo oĝuahêvo
Jaguapy mesa jerére
Ha karu guasu jajapo.
Ka'arupytû jave
Jajogueraha tupâópe
Jaromandu'ávo Hesu
Ombojepyhéirôguare
Umi hemimbo'ekuépe.
Upépe avei oî
Umi opurahéi asýva
Hérava Estacionero
Ha avei Pasionero
Ha'ekuéra omombe'u
Hesu jehasa asy
Chupe ojererahárô
Aipo kurusu rapére
Ha yvytýpe oĝuahêvo
Ojehupi kurusúre
Ha heta jejahéi rire
Ojejuka ichupe
Upe mba'eguasuete
Estacionero opurahéi
Imandu'ávo ñandéve
Mba'éicha Hesukirito
Ñanderehehaitépe
Hekovemi ome'ê.


V
Arapoteî marangatúpe
Ja'éva viernes santo
Ikirirîguasu iko'êvo.
Avave nopyrûhatâi.
Ñañeakâky'o rire
Jahapaite ñañandu
Umi ñane pehêngue
Omanóva ñandehegui.
Asaje rupi ñahendu
Yvyrapararâ ryapu,
Matraca chupe ja'éva,
Ñanerenói tupâópe
Ñambomba'eguasu haĝua
Hesukirito mano
Ha umi pokôi ñe'ê,
Aipo siete palabras,
Ipahaite he'iva'ekue
Ome'êvo hekove.
Tesay ha tovasýpe
Jahechajey upe mba'e.
Py'arasy opavavépe oñuvâ
Pasionéro purahei asýnte
Huguápe oñehendu.
Oñemboguejy rire
Hesu retekuemi
Ojeroguata tupâo jerére
Ha oñemoinge ipype.
Tupâo oñemonde ao hûme
ha temimbyasy iñasâi
Ápe ha pépe.
Upe rire jahecha
Tapicha ojoapykuéri
Oñemboja ha otupaitû.
Oîjey upégui ohóva
Oitupâitûjeývo
Ambue tupâópe...
Pokôi ohupyty peve.

VI
Mba'e asyete rire
Oĝuahê ára guasu
Arapokôi verapy
Sábado de gloria ja'éva
Pa'ikuéra tupâópe
Tuichaháicha omombe'u
Hesukirito jeikovejey.
Vy'aguasu ñandeaho'i
Jaikuaávo upe mba'e
Avei ombopyahuha
Opavavéva rekove.
Ambue ára ko'ême
Jaha ha ñatupânói
Ñande ru ha ñande sýpe
Maína ha paínope
Ha ñandepakua mokôive.
Péicha, ñande rekópe,
Jahasa oñondivepa
Arapokôindy guasuete.
Hi'âiténgo Hesu jeikovejey
Ñanderesape'a opavavépe
Ha tajaiko oñepehênguéicha,
Py'arory, kunu'û ha mborayhu pópe.

ooo000ooo


Leer KARU GUASU, ANTE EL AYUNO DEL VIERNES SANTO - EFE, en (http://lenguaguarani.blogspot.com/2017/04/karu-guasu-un-gran-almuerzo-ante-el.html)

Ver ESTACIONERO ÑEMBO'E HA PURAHÉI – JOSÉ CALAZÁN, en (https://www.youtube.com/watch?v=qnjKghxEVic&feature=em-upload_owner)




Publicado por en

No hay comentarios:

Publicar un comentario

Suscribirse a: Enviar comentarios (Atom)