MBA'APOHÁRA REKOPOTÎ (1 DE MAYO: DÍA DEL OBRERO)

MBA'APOHÁRA REKOPOTÎ

Ohai: David Galeano Olivera

Leer original (hacer clic) en (http://lenguaguarani.blogspot.com/2017/05/mbaapohara-rekopoti-1-de-mayo-dia-del.html)

Leer también en (https://dgaleanolivera.wordpress.com/2017/05/01/mbaapohara-rekopoti-1-de-mayo-dia-del-obrero/)

I

Opaichagua tembiapo

Ko yvy ári oî

Ivevúi ha ipohýiva

Hasy ha ndahasýiva

Iporâ ha ivaíva

Arakue ha pyhareguáva

Ha umírupi jahecha

Tapicha omba'apóva

Ha omboajéva ñe'ênga

Opavave jaikuaáva

“Nde syva ry'ái rupi

Nde rógape reraháta

Hi'upy nemba'erâva”

Tekotevê ja'e avei

Pe mba'e ñambyasyetéva

Ára ha ára ojehúva

Jahechávo tapicha

Huvicha ohuguy'óva

Chavurróicha omba'apo

Ha mbovymi ohupyty

Pe viru oikotevêtéva.

II

Mba'apohára peichagua

Ñane retâme oî

Kuarahy osê mboyve

Térâ ka'arupytû jave

Ohóva imba'apohápe

Upépe ñembo'yhápe

Óga okápe oî.

Taro'y térâ haku

Oky ha ára porâme,

Omaña ápe ha pépe

Oñangareko ijerére,

Ani haĝua oñemboja

Mondaha térâ ambuéva

Ojapo mba'e vai

Óga ha ogayguáre

Opytáva ipoguýpe.

III

Kirirîháme oî

Avave noñe'êi chupe

Héra jepe ndojekuaái.

Oîmínte upépe ha

Sapy'arei ojavýrô

Tuicha ojeja'o

Noiméiramo oñemosê.

Ogaygua kate atýra

Noñandúi pe tapichápe

Ndaipóri hendive

“Mba'éichapa reikomi”.

Heta oî óga jára

Nopyrûmbáiva katégui

Ohasávo henonde rupi

Nomañáiva hese.

Avavéngo ndoikuaái

Ha'e orekoha

Hogaygua ohayhuetéva

Hembireko ha iñemoña

Isy térâ itúva.

Herakuérape osêha

Ha ojapo ikatumíva

Ani haĝua ha'ékuéra

Oiko asy térâ

Ohasa ñembyahýi.

Ajépango ijetu'u

 mba'apohára reko.

IV

Oĝuahêvo imba'apohápe

Py'atytýipe oî

Jepémo ndohechaukái

Kyhyje guasu oñandu.

Oñembo'e Ñande Rúpe

Ha chupe ojerure

Pytyvô ha mbarete

Ha hembiapo tosê porâ.

Tuicha ipy'aguapy

Oĝuahêvo aravo

Ha hekovére ojevy

Ohetûmba hogayguápe.

Péina ko ára guasúpe

Mba'apohára ára ja'éva

Ndaipotái chehegui ohasa

Ha'e'ŷre chupe

Amomba'eguasuha

Hembiapo.

Upévare chupe ha'e

Aguyje che angirû

Nde ha'égui añetete

Tekove techapyrâ...

Mba'apohára rekopotî

ooo000ooo

Leer SABINO BENÍTEZ OMANO, en (http://lenguaguarani.blogspot.com/2017/04/sabino-omano.html)

Leer ARAPOKÔINDY MARANGATU, en (http://lenguaguarani.blogspot.com/2017/04/arapokoindy-marangatu-semana-santa.html)

Leer RODRIGO QUINTANA OÑEMBOGUE, en (http://lenguaguarani.blogspot.com/2017/04/rodrigo-quintana-onembogue-31-03-17.html)

Leer ARAPYTU, en (http://lenguaguarani.blogspot.com/2017/03/26-de-marzo-dia-del-clima-arapytu-ara.html)

Leer ARAROGUEKÚI, en (http://lenguaguarani.blogspot.com/2017/03/araroguekui.html)