ÑAKYRÂ

 ÑAKYRÂ

Ohai: David Galeano Olivera

Leer original (hacer clic) en (https://lenguaguarani.blogspot.com/2020/12/nakyra.html)

Leer también en (http://dgaleanolivera.wordpress.com/nakyra-cigarra/)

 

I

Ñakyrâ porâite asy

Ñande Ru rymba poravopyre

Yvágagui rejúva

resê reveve

ha remyasâi tetia’e

Nde purahéi ayvuete

Opavavénte oikuaa

Ndaipóringo ndehegui

Herakuâporâvéva

Ñakyrâ porâite asy

Ñande Ru rymba poravopyre

II

Kuarahy oñemívo ñande rekohágui

Jasy ha mbyja chupe oñuâvo

Péinama reperere, mbykymi reveve

Reho reguejy yvyra rakâre

Ha eñepyrûma nde ayvu roryete

Ndaipóriko ndéicha oñeha’ârôva

Ka’arupytû oĝuahê jave

Maymave apysápe

Ne marandu oike

Tupâra’y ára oĝuahêmaha

Kuarahy oñemívo ñande rekohágui

Jasy ha mbyja chupe oñuâvo

III

Mitâ, kakuaa ha itujapyréva

Oikuaa porâ remombe’uha

Tupâra’y ára oĝuahêmaha

Mbokaja poty ryakuâ asyetéva,

Sandia, merô ha ka’avove’i

Omyenyhêmba ñande rekoha

Ha ombopyahu jeikove tuja

Nde puraheimi opoko ore ánga

Ha ojerure opa tekovépe

Jaikopa haĝua peteî ñe’ême

Mborayhu rapére jaguata haĝua

Ha jaiko haĝua vy’a ha torýpe

Mitâ, kakuaa ha itujapyréva

Oikuaa porâ remombe’uha

Tupâra’y ára oĝuahêmaha

IV

Resê

Nderetia’e

Revy’a

Reperere

Reveve

Rejupi

Reguejy

Repurahéi

Ndeayvu

Rekirirî’imi

Nekyre’ŷ

Reho

Rejere

Reju ha

Repuraheijey

Tupâra’y jeikovejey

V

Ndaipóriko ndéicha ojecharamóva

Tupâra’y ára oĝuahê jave

Mitâita oñani nderupytyse

Ipy’aropúta ha opukajoa

Oñani hatâ, ojupi yvyráre,

Ho’a, opu’â ha ojeity nde ári

Ha ipo mokôivépe nera’â hikuái

Kane’ô, mbyry’ái ha vy’ápe

Omombe’u hapichápe

Mba’eguasuete ojapova’ekue

Péichahágui ipopa’â nderehe

ha reiméma ipópe

Nemosâ ha ápe ha pépe ndereraha

Itaju mimbícha ndegueroayvu

Upéinte sykuéra he’íne imembýpe

“Pepoi chugui, Ñande Ru ipochýne

Hese pejahéirô”

Ndaipóriko ndéicha ojecharamóva

Tupâra’y ára oĝuahê jave

VI

Pyhare marangatu vove

Remoirû nde purahéipe

Tupâra’y arareñói

Ñaimo’âku nderoryvéva

Reikuaágui Tuvicha upe oúva

Omopotî ha omyesakâjeývo

Ko yvóra guasuete

Tupâra’y reñói rire

Nde, Ñande Ru rymba poravopyre

Mbeguekatumi reguejy ipaha

Peteî yvyra rakâmíre ha pépe, puraheihápe,

Resê, rejehekýi ha mandu’arâmi reheja oréve

Nde pire, ñakyra pire

Áĝa ambue arýpe, jepiveguáicha,

Rejujeýne ha…

Pyhare marangatu vove

Remoirû nde purahéipe

Tupâra’y arareñói

 

ooo000ooo

 

Ver ÑAKYRÂ, en (https://www.youtube.com/watch?v=6emjwljxcNg)

 

Ehecha Ñakyrâ ko’ápe (http://www.youtube.com/watch?v=XTn7UWih_Yw)

 

Rehendusérô Ñakyrâ, ehesakutu ko’ápe (http://www.youtube.com/watch?v=G6aViXLZtaw)