ACOSTA ÑU

ACOSTA ÑU

Ohai: David Galeano Olivera

Leer original (hacer clic) en (https://lenguaguarani.blogspot.com/2026/11/acosta-nu.html)

I

Pehendúpa angirũ,

Pehendu peikuaápa

Mba’e guasuete

Acosta Ñúme ojehúva.

Paraguáype hyapu

Mitãmimi sapukái

Tasẽsoro, kyhyjépe

Pytyvõ ojerure

Umi mitã porãite

Ndojapóiva ivaíva

Ohayhúva hetã

Acosta Ñúme omano

Ojejuka, ojehapy.

Mandu’arãme opyta…

Pehendúpa angirũ

II

Cháke, pehechápa angirũ

Añaretãgui osẽ

Ha upégui ou

Tekove ñaña

Añamemby memete

Mbohapy tetãgua

Kavaju ári ou

Opyrũ, omondoro

Oikutu, ombokua,

Mitã Paraguay

Iñakãmimi oikytĩ

Ha upéi ohapy

Omyendy Acosta Ñu

Ha upéi moñáita

Añaretãme ojevy

III

Pehecha, pehendúpa angirũ

Mba’eichaite ojejuka

Mitã Paraguay

Tupã jepeve

Hesay oity

Ombyasy añete

aña rembiapo

Upépe omano

Mitãmi porã ha hekopotĩva

Paraguay ra’y opu’ãva ohóvo

Ajépa hasy mitãmi mano

Upete guive mandu’ápe oĩ

Mba’e vaiete hesekuéra oikóva

Mitã Acosta Ñu

Omano, oikove,

Omano, oikove

Omano, oikove

Ko’áĝa peve…

Iporã ja’e ha taimbaretéke:

Acosta Ñugua nomanomo’ãi araka’eve…

ooo000ooo

Ver ACOSTA ÑU EN YOUTUBE, en (https://www.youtube.com/watch?v=7pHIRx0GMwA)