KO ÁRAPE OÑEPYRÛ ARAPOKÔINDY MARANGATU - HOY EMPIEZA LA SEMANA SANTA

ATENEO DE LENGUA Y CULTURA GUARANI
Maitei opavavépe
David Galeano Olivera

KO ÁRAPE OÑEPYRÛ ARAPOKÔINDY MARANGATU – HOY EMPIEZA LA SEMANA SANTA
Ohai: Alberta Margarita Leiva Villaverde (01-04-2012)
Leer original (hacer clic) en: http://cafehistoria.ning.com/profiles/blogs/ko-rape-o-epyr-arapok-indy-marangatu-hoy-empieza-la-semana-santa
Leer también en: http://dgaleanolivera.wordpress.com/ko-arape-onepyru-arapokoindy-marangatu-hoy-empieza-la-semana-santa/

Oñepyrû arakuéra marangatu, arakuéra tuichavéva,
Tupâ ra’y (Ñandejára ra’y)
Ome’éhague iporâitevéva mborayhuchaukaha
Ñahendumíkena peteîteî umi iñe’ê
jajesarekomi opa mba’e ojapóva’ekue rehe
Umívako ha’e mba’e imarangatuvéva oikova’ekue yvy ape ári
Ñe’ê ha apopykue techapyrâva ikatu’ŷtava
Araka’eve oiko térâ ojehupytyjey.
 mba’e rupi opa aravo, arakuéra marangatupeguáva,
ndohupytyichéne ñaikûmbypa haĝua ko tembiasakue marangatu,
Mborayhu rembiasakue marangatu ijojaha’ŷvéva ojekuaaukáva’ekue.
Jahechániko Tupâ mborayhu oñemokangy
omongakuaa ha oñemomarangatu haĝua tapichakuérape;
peteî Tupâ oñemomichîetéva
oñemoî haĝua tapichakuéra rendápe, omopu’âvo chupekuéra yvatete;
peteî Tupâ oñemoîva poguýpeguavaramo,
ombojepyhéi haĝua tapichakuérape
peteî Tupâ ojechaukáva hi’upýramo
ombogue haĝua tapichakuéragui vare’a;
peteî Tupâ ojechaukáva mbujape marangatúramo
ipu’aka haĝua tapichakuéra rembiapo vaikue rehe;
peteî Tupâ hembiasa asýva omanoite pevéramo
omoingove haĝua tapichakuérape
peteî Tupâ oguejyva’ekue tatakuápe
Oguenohê haĝua tapichakuéra pytûmbygui
Araka’evéko ndojehecháiva’ekue yvy ape ári peteí mborayhu potî imarangatuetéva,
Jahecháta avei mba’éichapa tekove ru’â
oñembotavy ha oñemboykeva’ekue
imborayhu ipokatuvégui tekove ru’âgui,
Ha ñanembojopói tekove hu’â’ŷva resapégui.
Péicha ñanehekombo’e teko tenonde rape
ha’eha tapykue jeiko,
tekove rape ohasaha tekove ru’â rupi jehasa rupi,
Tesape rape ohasaha kurusu rupi,
Jaikomína teko marangatu poguýpe ko arapokôindy,
ikatuhaĝuáicha jaike mborayhu pypukuve raitýpe,
mborayhu pypukuve ohasáva teko asyete raity rupi.
Ha’e niko ára marangatuete,
Oñeha’ârô rupi Tupâre jeroviápe, ojeiko asýrô jepe
Ha’e niko arapokôindy oha’arôva ñandehegui
Ha’e niko arapokôindy ñañemboja haĝua mayma omomba’eguasúva hekove rupi â mba’e hesakâmba’ŷva
ñañeha’âva’erâ jahechakuaa Tupâ reko asy
mayma heko asýva, ha mayma ojeguereko asýva rupi
ñañeha’áva’erâ jahechakuaa Tupâ marangatu
tapicha oporopytyvôva ha oporomosâsóvape
ñañeha’âva’erâ jahechakuaa Tupâ hekove pyahúva reko
Tapicha oñeha’áva ha oha’âróva rupi.
Jaikovékena arapokôindy marangatu ñembo’e ha ñopytyvô rupi
Ñamomba’eguasúkena teko marangatu rupi opa mba’eguasu hesakâmba’ŷva ha ñañemoaĝui tekoguapy rehe.
Jahupimíkena Tupâ ra’y rape teko asykue,
mayma tapicha mboriahu rembiasa rupi
ñanerasêkena ñande rapichakuéra reko asy ha reko ru’â ñeĝuahê rehe
Umi mba’épe oî gueteri Tupâ ra’y arapokôindy marangatu
Jaikuaápiko mávapa arapokôindy marangatu iporâvéva?
Ndaha’éi arapokôindy Roma, Sevilla térâ ñande tavapeguáva
Ha’e pe arapokôindy omombyky ha ombovevuivéva teko asy rape,
pe arapokôindy omombykýva teko asy rape
peteí tukumbo, térâ peteî ñuatî taperegua jehekýi
peteî aravo, peteî mba’e hasýva térâ jeguereko asy
ñamopokâve mba’e vaípe je’a, tesay, teko aña ha tekojoja’ŷ
Ñamopokâvékena ñembyahýi ha tesarái.
Ñañeha’âkena ñamombykyve ára ha ára teko asy.
oĝuahê pya’eve ha ipukuve haĝua ára tekove pyahu marangatu heñói ha okakuaaha…