ÑE'ÊPOTY GUARANÍME - POESÍAS EN GUARANI DE CEFERINO SEGOVIA COLMÁN

ÑE’ÊPOTY GUARANÍME – POESÍAS EN GUARANI
Leer original (hacer clic) en: http://groups.google.com.py/group/guarani-nee/web/epoty-guaranme---poesas-en-guarani-de-ceferino-segovia-colmn

CHE REINDY JUKY
Ohai: Ceferino Segovia Colmán ( * )
I
Nde resa ysapy mborayhu ygua
Nde pire satî kunu’û rupa
Vy’a apyra’ỹ che rete rasa
Repukavymíramo reja che rendápe
II
Oime ka’aguýre ku ka’avove’i
Roky hovyûvaicha pe nde áva iporâ
Pe nde pyti’áre mborayhu opupúva
Ñemihápe oikómi chemoingo asy
III
Nde juru mbytégui amo che ñe’âkuápe
He’ê asyvéva añandu otyky
Ndaikatumo’âigui avave oikuaa
Ñemihapemínte nde réra ahenóiva
IV
Roñandu ypy guive che reindy juky
Aipo vy’a’ỹ ndaijavéi che ypýpe
Ko che py’apýpe katui amoñe’êva
Che pytu opávomante okirirîne

IKAÑYMBY
Ohai: Ceferino Segovia Colmán
I
Mbyja iporâvéva ogueháicha oĝuahêvo pe ko’êtî
Peteî ahayhuvéva péina okañy chehegui
Tape tujáre ahakuévo ajuhu ipypore
Che hay’ópe chejuvy ne pore’ ỹ jasy memby
II
Arapahávaicha chéve ojopy che rekove
Heta araro’y pukukue arohasa vy’a’ỹ
Che apytu’û aitypeka ahekávo tetia’e
Añeha’â ikatuháicha ndererami amoñe’ê
III
¡Ha! Tupâsýma haĝua cherupyty ihovasa
Oĝuahênte peteî ára neñapytî ojora
Hechapyrâ iporâvéva che renondépe omoî
Mba’e porâ omoheñóivo ndejokuaimi che rendápe

NDACHEPO’ÁI NDEREHE
Ohai: Ceferino Segovia Colmán
I
Che reindy juky rohenóita
Reikuaa porâgui che rohayhuha
Avy’araságui ku chemoirûramo
Mitâ tavymícha cherykuepaite
II
Oimentevoi omopytûsêva
Tape potîete ñandeguataha
Upeicharupínte reho mombyry
Ambue tetâme tesarái rekávo
III
Nde che mborayhu ndache’areichéne
Ereva’ekue chéve jeyjey rehóvo
Hetaite árama vy’a’ỹ puku che rete jopy
Ho’ysâvéva pore’ỹ pypukuetéva añandu
IV
Pytângy arapópe kuarahy oikekuévo
Mandu’a ijohavévamante oĝuahê che rendápe
Ndéve ĝuarâ Gracielita taipoty ko’ê pyahu
Naimo’âiramojepe jajeíne haĝua ojuehegui

( * ) Ceferino Segovia Colmán, poeta popular y mecánico, nació en Villa Elisa (Departamento Central, Paraguay), el 8 de enero de 1942. Allí formó su familia y continúa viviendo en la actualidad.