Lengua Guarani

Lengua Guarani
Ára Pyahu

sábado, 15 de agosto de 2015

PARAGUAY, CHE TÁVA GUASU

PARAGUAY, CHE TÁVA GUASU
Ohai: David Galeano Olivera
I
Ha, Paraguay
Péina oĝuahêma
Ne aramboty
Che táva guasu.
Ára porâite
Voi hokypu
Ha vy'apavême
Nemomaitei.
Kuarahy ojupi
Omimbi, ojajái
Ha ohesape
Yvága hovy.
Yvytu kangy
Ituruñe'ême katu
Neguerochichî.
Tajy opaichagua
Ijyvotymíme
Nembojeguapa,
Pytângy, morotî, sa'yju
Iñasâi tapére
Ombohetia'e
Ñande resakuéra
Ha ombohory
Ñane korasô.
Ha, Paraguay
Che táva porâ
Mávaiko oimo'âta
Peichaite peve
Neporâiteha.


II
Ha, Paraguay
15 jasypoapy
Iko'ê rory,
Guyrami oveve
Ha isaraki
Oparupirei
Ojupi, oguejy,
Ou ha oho,
Ipuraheimi
Ndéve omoĝuahê
Ne arambotýre.
Amove katu
Jepive osyry
Hape tujaitére
Ysyry guasu
Nde réra oraháva
Ha nde ypy guive
Oikuaaporâva
Ne rembiasakue.
Ha'éngo ohecha
Mba'éicha peve
Rekakuaa
Ha rejepyso,
Upéicha avei
-Upe osyryhágui-
Ohechakuaa
Nde reko tuja,
Nde reko pyahu,
Ha'éngo ohecha
Oga tujami ha
Ogaita pyahu
Opu'âva ohóvo,
Yvate ojupíva
Ohupytységui
Ñande Ru renda.
Ha, Paraguay
Ndeichagua ndaipóri
Ko yvy apére
Táva porâite.

III
Ha, Paraguay
Kuña, kuimba'e
Mitâ, kakuaa
Ha opavavete
Ndepype roikóva
Ko ara porâitépe
Oreaguarapa
Ha rosapukái
Ko'ápe ha pépe
Neporâiteha.
Upéicha avei
Tupâsy María,
Ñande Sy Guasu,
Ndereko ipoguýpe
Ha nesâmbyhy,
Takate'ŷ pópe,
Tape añeteguáre
Ikatuhaĝuáicha
Ne memby maymáva
Nembotuichave,
Nemongakuaa
Ha nderupi yvate
Ha ko'ê ko'êre
Tanerenyhê
Tesâi ha torýgui
Ha, Paraguay
Péina oĝuahê
Ne aramboty
Che táva guasu.

ooo000ooo
Ver PARAGUAY, CHE TÁVA GUASU, en (https://www.youtube.com/watch?v=C7BrKimdQj8)

Leer DAVID GALEANO OLIVERA: HIJO DILECTO DE LA CIUDAD DE ASUNCIÓN, en (https://lenguaguarani.blogspot.com/2014/05/david-galeano-olivera-hijo-dilecto-de.html)

No hay comentarios: