AGUYJE FÉLIX FERRARI

AGUYJE FÉLIX FERRARI

Ohai: David Galeano Olivera

Leer original (hacer clic) en (https://lenguaguarani.blogspot.com/2019/09/aguyje-felix-ferrari.html)

I

Ajépango ivaiete

Ñane retâme ojehúva

Tapicha hetârayhúva

Ñuha guasúpe ho'a.

Añaretâgui osê

Umi añamemby ivaivéva

Samura rembiguái atýra

Chupe omosâso hag̃ua.

Oñepyrûma upépe

Mboka guasu guasuete

Ápe ha pépe ondyvu

Ha peichahápe

Ojapi, ohupyty

Félix Ferrari rete

Ha mba'eve'ỹramoguáicha

Umi añamembyre

Hekove ombopaha.

Ferrari omoî hete

Omoañetévo iñe'ê

Ikatuha peteî ára

Ome'ê pe hekove

Ñane retâ rayhupápe.

 

II

Upe ára vaípe

Ferrari ha ijykéregua,

Ita'ýra tahachi,

Ojapónte hembiapo

Omoirû ha ogueraha

Pe moñái hekotujúva

Samura-pe ojekuaáva,

Emboscada ka'irâime,

Ha tapére osê chupe

Umi añamemby atýra

Mboka guasueta ipópe

Omboperepepe, omosunu

omboparapa upe tenda.

Upéicha omano Ferrari

Ha tyre'ỹme oheja

Opavave hogayguápe

Ha iñangirû maymavépe.

Ha'éngo añetehápe

Kuimba'e py'aguasu,

Upe ka'aru guive

Mandu'arâme opytáva.

III

Péicha jave ñambyasy

Mba'éichapa mburuvicha

Ndohechakuaái, o'apo'i

Policía rembiapo.

Ojoguarângue chupekuéra

Mboka, mba'yru,

ao ha ambue tembipuru

Ymaitéma oikotevêva

Ha'ekuéra -po guasu-

Omombo pirapire

Vyrorei opaichaguápe

Ha oheja tahachípe

Ao vuvuimi ijapére

Ombohovái hag̃ua

Umi añamemby atýra

Henyhêva mboka guasúgui.

IV

Aguyje Félix Ferrari

Nde rekove reme'êre.

Hi'âiténte ne mano

Omombáy mburuvicha

Ha ñane retâ porâitépe.

Ajerure po guasúpe

Toñangareko tetâyguáre

Hi'âitémango ojapo

Mba'e iporâ añetéva

Ha tomboyke

Pokarê, tovamokôi,

Ñembotavy ha oparei

Péichante jahavérô

Mombyryvéta ohóvo

Pe tetâ jaipotaitéva

Ipoty ha hi'ahápe

Tekojoja, py'aguapy,

Tekosâso ha vy'a.

Néike che retâygua

Oñondivemante ikatúta

Paraguay ñampu'â

Tomimbi ha tojajái

Opavavetépe g̃uarâ

ooo000ooo

Ver AGUYJE FÉLIX FERRARI, en (https://www.youtube.com/watch?v=sEZzMnV31K4)

Ver SABINO OMANO, en (https://lenguaguarani.blogspot.com/2017/04/sabino-omano.html)