ANÍKE REJEJUKASÉMBA'E - 10 DE SEPTIEMBRE: DÍA DE LA PREVENCIÓN DEL SUICIDIO

10 DE SEPTIEMBRE: DÍA DE LA PREVENCIÓN DEL SUICIDIO

ANÍKE REJEJUKASÉMBA'E

Ohai: David Galeano Olivera

Leer original (hacer clic) en (https://lenguaguarani.blogspot.com/2019/09/anike-rejejukasembae-10-de-septiembre.html)

I

Mba'etekópa che angirû

Mba'éichapa reikomi

Hi'âiténgo tapiaite

Nde rekove henyhê

Opaite mba'e porâgui,

Ha oimérô peichahágui

Neañomi rejehecha

Ha ereko ndekutu'asýva

Ne korasô mbytetépe.

Vaicha ndéve

Mba'evéma naiporâvéi

Ha nde rekovemi

Ipahápe remog̃uahêse.

Aníke upehaguére

Rejejukasémba'e.

Upévango naiporâi

Emboguetéke ne akâgui.

Aníke reñeme'ê,

Akóike eñorairô.

Tekovéngo iporâ.

Eikuaáke ikatuha

Ko'êrô iñambue

Ha mba'e vai rekovia

Nde rekove henyhêta

Opaite mba'e porâgui.

 

II

Péicha reñeñandu jave

Eheka rehayhuvévape

Taha'e nde sy, nde ru,

Ikatu ne angirû térâ

Ambue ne pehêngue

Ha eñe'ê hendive,

Chupéke emombe'u

Upe mba'e ndeapyhýva.

Katueténgo rejuhúta

Peteî tape pyahu

Nde rekovépe g̃uarâ,

Upégui reiko hag̃ua

Py'arory ha vy'a,

Py'aguapy, tetia'épe.

Eikuaáke che angirù

Ndepypéngo oîha

Pu'aka ha mbarete

Ikatúva nenohê

Maymaite tape pytûgui

Ha ikatúva avei

Nemoakârapu'â

Ha ndereraha tenonde.

Upévare che angirû

Aníke reñeme'ê

Eñorairôke akói

Ha nde rekove...

Tahoky, taipoty ha tahi'ajey,

Tovera, tomimbi ha tojajái

Ha tahenyhê mborayhu

Ha ijapyra'ỹva vy'apavégui.

ooo000ooo

Ver en YOUTUBE (https://www.youtube.com/watch?v=YJq7QKGFCdE)

Leer PU'AKA, en (http://lenguaguarani.blogspot.com/2016/07/puaka_21.html)