jueves, 21 de julio de 2016

PU'AKA

Remoñe'ê haĝua... ku reñeñandu vai jave
PU'AKA
Ohai: David Galeano Olivera
I
Sapy'ántengo re'a
Yvykua pypukuetépe
Nde rete osyryry
Oñembota ápe ha pépe
Ha upekuévo reñandu
Reñenupâvaipa
Ha pya'e, reho, repa
Yvykua opaitehápe,
Vaicha ndéve oĝuahêha
Nde rekove pahami.
NDAUPÉICHAI, CHE ANGIRÛ
ANÍKE REÑEME'Ê
Nerasê meve ikatu
Ha nde resay tyky tykýpe
Remopotî ne angami,
Ha upéike emaña
Amo ne korasô mbytépe
Upépengo oî PU'AKA
Ndevoi reguerekóva
Heta árante ohasa
Chupe nereñandúi
Ha chugui nderesarái.
Epayjeýke che angirû
Epu'â, ejetyvyro,
Ne'írâ oĝuahê pe ára
Ko'águi reho haĝua,
Oî gueterei yvy ári
Heta ne rembiaporâ.
Ta'ânga: Mati Galeano
II
Eguatáke che angirû
Embopyahu nde reko
Emyasâi ne mborayhu,
Eñeha'âke evy'a,
Epukáke opavavépe
Emba'apo mbareteve
Ani reñeme'ê kaiguépe
Arapýngo iporâ
Tekovéngo iporâ
Nde rekohángo iporâ
Ha nde avei neporâ.
Mborayhu ha tetia'e
Opa mba'e omonguera,
Upévare roñatôi
Ha ndéve ha'ejey
ANÍKE REÑEME'Ê
Che angirû rohayhuetéva,
Oimérô reikotevê
Ápe añembo'ýma nde ykére
Opavavéngo jahasa
Opaichagua ñepysângáre
Ha umi mba'e ojehu vove
Jaipurúke pu'aka,
Jaipurúke mbarete,
Jaipurúke mborayhu,
Ha jajeroviáke yvateguáre,
Oîva ñandepype
Ha ñande rekove omyenyhêva
Mborayhu, pu'aka ha tetia'égui.
(Che angirû MDA-re chemandu'ávo)
 
ooo000ooo