MÁVAPA OIMO'ÂTA

MÁVAPA OIMO'ÂTA

Ohai: David Galeano Olivera

Leer original (hacer clic) en (https://lenguaguarani.blogspot.com/2020/04/mavapa-oimoata.html)

Leer también en (https://dgaleanolivera.wordpress.com/2020/04/08/mavapa-oimoata/)

I

Jaikohaguégui

Ápe ha pépe

Py'atarovápe,

Py'atytýipe, pya'e pya'e

Aravo jepe

Mbykými ñandéve.

Ñande rekove

Nome'êvéima.

Nahembyvéikuri áravo

Ñane pehêngue

Ha ñandéve g̃uarâ,

Ñandepochypa,

Jajosapukái,

Jajoja'o vyroreíre hamba'e

Ñanderesarái kunu'û

Mborayhu ha vy'águi

Péichakuri...

II

Upéinte og̃uahê

Ára vai, ára pohýi

Nañaha'ârôietéva

Ñanderovapete

Ñanembokacha

Ñanemombo

Ñande rógape

Ñanemoakâguapýsapy'a

Ha tuicha ñanemongyhyje

Jahecháma omanóva

Ha oñepyrûma jerure

Ñañeñangareko hag̃ua.

Mávapa oimo'âta

Péva ojehutaha.

III

Nañasêvéi

Ndajahavéi ñane mba'apohápe

Ñane mbo'ehaópe

Ndajahechavéi ha nañahetuvéi

Ñande sy, ñande ru,

Ñande ra'y, rajy, memby,

Ñane angirûmimíme.

Ipore'ỹsapy'a ñandehegui umi mba'e

Ñemoha'eño oñemomba'e ñanderehe

Ko'ág̃a jaiko ñembotypýpe

Ha jaheka pe tekosâso

Peichaiténgo ojehu

Mávapa oimo'âta...

Iñambuepaite ñande rekove

Ko'ág̃a hembypa ñandéve aravo

Ha akâguapýpe ñamaña

Ñane rembiasáre,

Ha jajepy'amongeta.

Ñanemandu'ásapy'a

Tupâ, Ñande Rúre

Upekuévo, váicha japáy,

Jahecha ha ñañandúva

Ñande ykereguápe

Oîva ñanendive ñande rógape

Ko ñemoha'eñopukúpe

Ñañe'ê hendive, japuka,

Jajohayhu, javy'a,

Jajohecharamo,

Ñañomomba'eguasu

Ñañomombarete

Jaikuaágui ñaikotevêha ojuehe.

Ñahenói ñane pehêngue

Ha ñane angirûnguérape

Ha ñame'ê ojupe maitei horyvéva

Ha ñañomokyre'ỹ ja'évo ojupe

Ñasêtaha tenonde,

Py'aguasu ha jekupytýpe,

Oñondive, ojopógui

Tekove pyahúre...

IV

Ha upéicha,

Jepémo ndajagueroviaséi

Ko mba'e guasuete ojehúva

Amo hapópe,

Ohechauka ñandéve

Mborayhu ha jekupyty

Ha'eha tembipuru guasu

Jaguerekóva ha

Ome'êva ñandéve pu'aka

Ñambohovái hag̃ua

Taha'eha'éva mba'e.

Jaipurúnteva'erâ pu'aka

Ojaitypóva ñane ñe'âme

Ha jerovia ñandejehe.

Namombyryvéima,

Ñanderupytyjeýta

Ára pyahu,

Ha ñañomomaiteijeýta jepiveguáicha,

Ñañohetûjeýta, jajopopyhyjeýta

Ha ñañoañuâjeýta hatâ porâ

Ha ñamoñepyrùta tekove pyahu

Aníke ñañekangy, aníke ñanekane'ô,

Aníke ñañeme'ê... namombyryvéima

Upe aja, ñande róga guive,

Ñame'ê ojupe mbarete.

Néike che pehêngue,

Jaháke heseve

Oñondivepa ñasêta tenonde...

ooo000ooo

Ver YOUTUBE, en (https://www.youtube.com/watch?v=EaL3wMjcF5w https://www.youtube.com/watch?v=EaL3wMjcF5w)

Leer UNIFORMADOS, en (https://lenguaguarani.blogspot.com/2020/03/uniformados.html)