lunes, 16 de junio de 2014

ÑE'Ê GUARANI

ÑE'Ê GUARANI
Ohai: David Galeano Olivera
 
Leer también en (http://lenguaguarani.blogspot.com/2014/06/nee-guarani.html) 
Asimismo leer en (http://dgaleanolivera.wordpress.com/nee-guarani/)
 
I
Ñe’ê Guarani
Ñe'ê jukyete
Ha ijojaha'ŷva
Nereñoiva'ekue
Yma, ymaite
Yvy, Ñande Sy,
Pytu ypykuégui.
Ndepype oî
Ndepype ono'ô
Oñeñongatu
Arandu añete
Tekopy tee
Arapy jegua.
Ndéniko ha’e
Ñe’ê Guarani
Mba'e guasuete
Mba'erepyete
Hepykuaa’ŷva
Oremboaguaráva
Ha omoingovéva
Ore rekove.
Ndéniko ha’e
Ñe'ê Guarani
Ñe'ê jukyete
Ha ijojaha'ŷva

 

II
Ñe’ê Guarani
Ava apegua
Nde jára tee
Nderecharamo.
Mbya ha Paî,
Ava ha Ache,
Guarajo, Ñandéva
Ha'e ypykue
Nderéra oraháva
Ha hakate'ŷva
Ne mba'ekuaáre.
Jepémo imbovy
Sa'íma oî
Ko yvy apére
Ojepytaso
Oipotágui, nde,
Yvága ru'âre
Rejajái akói.
Paraguay retâme
Rejehaitypo
Ha opaite jurúpe
Ndepu roryete
Mitâ, kakuaa
Ha hi'arevéva
Nderecharamóva
kuehe, áĝa
ha ko'êrô ára
Oikuaaporâgui
Ndepype oîha
Hapo teete
Ichugui ojapóva
Tekove katu
Paraguaygua.
Ñe’ê Guarani
Ava apegua
Nde jára tee
Nderecharamo.

 

III
Ñe'ê Guarani
Ñe'ê arandu
Ha ijojaha’ŷva
Heta rehasa
Iro ha he'êva
Ha jepémo upéicha
Tekoverosâgui
Nerenyhête
Ha rehechauka
Yvypo maymápe
Ndepijy atâ
ha ndepyapyha
Nde reko ipukúta
Nde reñepyrûgui
Yvy, Ñande Sy,
Pytuhê ypýgui
Ha ha'e opávo,
Pytuhê pahápe,
Nderahajeýne
Ndereruhaguéicha
Remimbi haĝua
Ko arapy kuápe.
Ndéngo Guarani
Ñande Ru pytu
Ñande Ru katu
Ñande Ru jegua
Ñande Ru mba’e
Upévare péicha
Nde rekokatu
Ha nde pu’aka
Opaite mba’ére.
Ha, ñe'ê Guarani
Ñe'ê jukyete,
Ñe'ê arandu
Ha ijojaha'ŷva
 


(Ahechakuaávo ATENEO DE LENGUA Y CULTURA GUARANIme –
Tributo al ATENEO DE LENGUA Y CULTURA GUARANI)