AVA SÂSO – HOMBRE LIBRE

10 de diciembre: Día de los Derechos Humanos

AVA SÂSO – HOMBRE LIBRE

Ohai: David Galeano Olivera

Leer original (hacer clic) en (https://lenguaguarani.blogspot.com/2025/12/ava-saso-hombre-libre.html)

I

Paraguay, ñane retâme

Ha avei ambue tetâme

Hetaiterei oîjepe

Tapicha oñemotîva

Ojepokua ha ojepykuáva

Tapicha oñenupâva

Tapicha ojekutúva

Tapicha ojejukáva

Hemiandu ojoavýgui

Mburuvicha, poguasu

Ha imbaretéva remiandúgui.

Umívape sa’ivérô

Oñemoinge ka’irâime

Ipýgui oñemosâingomi

Ha oñemoñapymi tepotípe

Ipytupa, ipy’aropu peve

Avei oîva’ekue

Ojehaviráva tukumbópe

Ipirejeka, huguypa peve

Terâ oñembojahúva

Y ro’ysâitépe

Ára ro’yve jave.

Aichejáranga ndaipóri

II

Ndaha’éi vyrorei

Ñane retâ ohasava’ekue

Heta ñane pehênguére

Péicha ojejaheijepe

Hetágui oikojepe NN

Hogaygua oikuaa’ỹre

Omohasê, omboao hû

Ha tyre’ỹme oheja

Maymave ipehênguépe

Umi mba’e apohare

Ndaitúvai ha ndaisýi

Ajevérô o’apo’i

Hapicha rekovemi.

Añamemby umichagua

Añaretâme ohova’erâ

Ha upépe toñandu

Jejahéi ha jejuka

Hapicháre ojapova’ekue,

Ha ñande ñaiméva ape

Tañamba’apojoaite

Mborayhu, tekojojápe

Ava sâso rehehápe,

Opavavépe g̃uarâ