POHÃ ÑANA

POHã ÑANA

Ohai: David Galeano Olivera

Leer original (hacer clic) en (https://lenguaguarani.blogspot.com/2025/12/poha-nana.html)

I

Pohã ñanami

Pohã ro’ysã

Ha pohã aku

Pohã piro’y

Pohã mbarete

Mba’e guasuete

Rembojeguapáva

Guarani yvy,

Paraguay retã.

Pohã ruvicha

Ñumimi, ysyry,

Ha ka’aguýgui rejúva,

Mayma tapicha

Ndepurumeméva

Opa mba’asy

Ombogue haĝua

Ndaipóriko ndéicha

Ipu’akapáva

Ha omboguevi,

Omboyke, omboguéva

Mba’asy vai

Taha’e ha’éva

 

II

Ka’ay akumíme

Térã tererépe

Akóinte reime

Remombarete

Rembopiro’y

Ha remohesãi

Mayma tapichápe

Pyno’i, kokũ,

Parapara’i,

Kavaju ruguái,

Kapi’i katĩ,

Tarope ha rúda,

Ka’arurupe,

Jate’i ka’a,

Ka’arẽ, roméro,

Ñandypa, amba’y

Sandia, merõ,

Ha andai ra’ỹi

Ndaijojahái,

Ndaihupytyhái

Mba’asy mboguépe

 

III

Tuichaite mba’éngo

Ñande Ru, Tupã

Ñandéve ome’ẽva

Ñandéve ohejáva

Pohã ka’aguy

Pohã añetetéva

Ñanemyehẽva

Tesãi, piro’y

Ha teko porãgui

Néike, che irũnguéra

Jaipurumeméke

Pohã mbarete

Pohã porãita

Akóinte oĩva

Ñande rekohápe

Pohã ñanami

Pohã mbarete

Tesãi ruvicha