miércoles, 14 de mayo de 2014

CHE SYMI MARANGATU

CHE SYMI MARANGATU
Ohai: David Galeano Olivera

I
Ndaipóringo ko arapýpe
Che symígui tuichavéva
Ha hekomarangatúva.
Ára ha ára chéve ome’êva
Mborayhu ha kunu’û
Pukavýpe opu’â ha
Omba’apo kyre’ŷme
Ndoipotágui ahasa
Mba’eveichagua vy’a’ŷ.
Upévare che ha’e
Ndaiporiha ko arapýpe
Che symígui tuichavéva
Ha heko marangatúva.




II
Kuña ijojaha’ŷva,
Tupâ jopói iporâvéva.
Chereruva’ekue yvy ári
Ha cherehe oñangareko
Ko’aĝaite peve ndajuhúiva
Tekove péicha ipyapýva,
Hekove jepe ome’êta
Imembymi rayhupápe
Upévare che ha’éva
Ndaiporiha ko arapýpe
Che symígui tuichavéva
Ha hekomarangatúva.


III
Yma, ko’áĝa ha upéi
Ahekáva ijoguaha
Ha mamove ndajuhúiva
Ndaipóri hupytyha.
Hekove techapyrâ,
Mba’e porâ memete.
Ku vy’a’ŷ che’apyhýrô
Ama’êmínte hese ha
Mba’embyasy ojehasáma.
Mba’e porânte ojapóva,
Mba’e vai ndoikuaáiva.
Ndareíringo oje’e
Ha’eha ko yvy ári
Tupâ rembijokuái
Omimbi ha ojajáiva.
Upévare che ha’e
Ndaiporiha ko arapýpe
Che symígui tuichavéva
Ha hekomarangatúva.



IV
Tupâme añepomoî
Ha chupe añakâitývo
Ambohasa che aguyje,
Ome’êre chéve jopóirô
Ko kuña rekokatu
Iporâite ha ijukýva
Ndorekóiva hupytyha.
Mab’éichamo ahepyme’êta
Mborayhu chéve reme’êva
Ndaipórigui ko arapýpe
Pirapire etaita
Ndéve ame’êkuaáva,
Kytomi ahechakuaávo,
Kunu’û chéve reme’êva.
Upévare -mba’eta rekovia-
Che ñe’âkuaitégui anohê
Mba’erepyve arekóva
Che ñe’ê hekokatuvéva
Ha péina ndéve ha’e:
Aguyje che symi marangatu.


(Ahechakuaávo Delia Olivera-pe, ha’éva che sy –
En homenaje a Delia Olivera, mi madre)
15-05-13




ooo000ooo