MITÂMI

MITÂMI

Ohai: David Galeano Olivera

Leer original (hacer clic) en (http://cafehistoria.ning.com/profiles/blogs/mit-mi)

Leer también en (http://lenguaguarani.blogspot.com/2015/01/mitami.html)

Asimismo leer en (https://dgaleanolivera.wordpress.com/mitami/)

I

Mitâmi

Mitâ

Tupâ pehê'i

Ánga morotî

Hesakâ asýva

Mborayhu raity

Pukavy rory

Tetia'ememe

Rete kyrŷimíva

Rova apu'ami

Ma'ê jukyete

Vy'a reruha

Mba'asy pohâ

Ñande Ru pytu

Mba'e porâite

Ijojaha'ŷva

Mitâmi

Mitâ

Tupâ pehê'i

  

II

Mitâmi

Mitâ

Tupâ pehê'i

Repáy ha resê

Nde sy ryepýgui

Nerasê resêvo,

Nepytuhêmi

Ha mbeguekatu

Reñandu nde sýpe

Nemokunu'ûva

Ha nemokambúvo

Chupe, vevuimi,

Repukavymi

Ha upe javete

Nde resamimi

Omimbi, ojajái,

Mborayhu eñandúvo

Ndéve ohekuavóva

Nde sy, Tupâsy.

Ndéngo mitâmi

Tory regueru

Remongarai

Ñande rekoha.

Mitâmi

Mitâ

Tupâ pehê'i

III

Mitâmi

Mitâ

Tupâ pehê'i

Mbeguekatumíme

remomýi ypy

Nde rete kyrŷi,

Rejere,

Rejetyvyro,

Retyryry,

Repoñy,

Repu'â ha re'a,

Reguata ha re'a,

Rengululu.

Reñeñanduka,

Repoko, reity

Ha rejokapa

Nde rapépe oîva

Cháke...

Nde jerére oîva

Osapukaijoa.

Ohasávo ára

Nembaretevéma

Reguatapya'éma

Sa'íma re'a

Reju ha reho

Reñani

Rejapyhara

Opaite mba'e.

Nde aguara,

Repuka,

Repuka soro.

Mayma ogaygua

Oikopa opóvo

Aniete haĝua

Ndéve ojehu

Mba'eve ivaíva.

Nde sy ha nde ru

Tuicha ijaguara

Ha ojerovu,

Ko'ápe ha pépe

Oiko omombe'u

Ne rembiasakue

Ha nde rekove

Overa hendýva.

Ajépa tuicha

Ha ndaijojahái

Mitâmi jeju

Pyhare ha ára

Ha'e ombohory

Ha ombopiro'y

Ñane tapŷimi

Mitâmi

Mitâ

Tupâ pehê'i

(Ale, Fer ha Sofi rayhupápe)