16 DE OCTUBRE: DÍA DE LA ALIMENTACIÓN - HI'UPY ÁRA

16 DE OCTUBRE: DÍA DE LA ALIMENTACIÓN – HI'UPY ÁRA

Ohai: David Galeano Olivera

Leer original (hacer clic) en (http://lenguaguarani.blogspot.com/2016/10/16-de-octubre-dia-de-la-alimentacion.html)

Asimismo leer en (https://dgaleanolivera.wordpress.com/2016/10/16/16-de-octubre-dia-de-la-alimentacion-hiupy-ara/)

I

Tekove maymáva

Jakaruva'erâ

Péva rehe'ŷ

Ndaikatúi jaiko.

Yvyporaháicha

Ñande retemi

Ñamomba'apo

Ha upéicha rupi

Jahupiva'erâ

Pe mbaretemi.

So'o hu'u

II

Ñande rekoha

Ome'ê ñandéve

Hetaite mba'e

Ja'umiva'erâ

Umíva apytépe

Oî temitŷ

Kumanda, avati,

Mandi'o, jety.

Oî avei

Hi'aporâitéva

Mbokaja, narâ,

Sandia, arasa,

Mángo ha merô,

He'ête asýva.

Jajuhu avei

Mymba ro'omi

Vaka ha kure,

Ryguasu, pira.

Opa â mba'e

Vare'a ombogue

Ñanemyenyhê

Ñanembovy'a.

III

Tuichaite mba'e

Umi hi'upy

Tesâi me'êha.

Ajépa hete

Ñane rembi'u

So'o apu'â,

Vori ha mbeju.

Rora, jopara,

Puchéro ha sójo,

Chipa, chicharô,

So'omi hu'û,

Sópa, mbusia.

Avei oime

Mba'e he'êmíva

Andai kamby,

Eíra kesúre,

Mbaipy he'êmi,

Ha Yva rykue

Âvango ha'e

Ñane rembi'u

Ndorekoivoíva

Ijojaharâ.

IV

Jakarukuaáke

Tekotevêháicha.

Jahechakuaáke

Oîha avei

Heta okaru'ŷva

Ha oikotevêva

Ñane pytyvô.

Ñaipehê'ami

Ha ñambohasa

Ñane rembi'u

Umi tapichápe.

Ani anietéke

Reñembokate ha

Aipo naiporâigui

Tembi'u emombo.

Heta oî upérupi

Oñendymokôva

Ha oiko asýva

Oguereko'ŷgui

Pe hi'upyrâ.

Eme'ê aguyje

Ko ára erekóre

Pe mbujapemi

Nemoryĝuatâva

Ha omombaretéva

Nde rekovemi.

Hi'upy ha'e

Ñanemoingovéva,

Ñanemohesâiva

Ha omombaretéva

Ñande rekove.

ooo000ooo

Ver ALIMENTACIÓN - HI'UPY, en (https://www.youtube.com/watch?v=uXuTjizr7Xk)

 

Leer MUJER RURAL – KUÑA OKARAYGUA, en (http://lenguaguarani.blogspot.com/2016/10/15-de-octubre-dia-de-la-m...)