jueves, 20 de octubre de 2016

CHE RU KARAI JUAN BENIGNO GÓMEZ

CHE RU KARAI JUAN BENIGNO GÓMEZ
Ohai: Pablino Gómez Vera
I
Maymavete tohendu
Ko'ápe amombe'úva
Che ru Juan Benigno
Rembiasa ore ykére.
Karai Guasu Juan Benigno Gómez
II
Ha'e karai jojaha'ŷ
Kavaju ári oikóva
Ipire anambusu
Kuarahy ohapy.
III
Mandu'ápe opyta
Henda moro ha tordillo
Rosillo arúko ha mburika
Âva hymba mba'apoha.
IV
Ko'ê mboyve
Kyre'ŷme opu'âva
Ñúre oho haĝua
Ombojere hymba.
V
Asaje pyte tinívo
Ojere karurâ
Ña Delia ijykére
Tapŷimi porâitépe.
VI
Kuarahy aku rire
Omboguy ikavaju
Omboy'u omokuarahy'â
Topytu'u pe asaje.
VII
Che ru upe aja
Yvapovô guýpe
Inimbe térâ kyhápe
Oñeno orambimi
Hete kane'ô topytu'u.
VIII
Upeichahágui
Hatâ osapukái
Iképe ohecha
Umi hapykuere.
IX
Ohechávaicha Indio
Ha'evéva jagua
Ohórô javoráipe
Sururúpe oike.
X
Upérupi omuña, teju,
Tatu, tapiti ha kaguare
Upéinte ndojerevéi, okañy
Upémarô osê oheka.
XI
Ojuhu karaguatatýpe
Vaicha ku okéva
Ha ohupi oañuâvo
Ohecha orekoha ipyapýre
Mokôi jarara râimbore.
XII
Peguahópe opyta
Upe jagua katupyry
Upéi heta ary rire
Ogueru hekoviarâ
Pillin jagua'i porâite.
XIII
Opáysapy'a, oguapy, opu'â
Kuarahy oike mboyve
Osê hymba lechéra reka
Ani vakara'y vare'a
Okambupa jepe chugui.
XIV
Oguapymi tataypýpe
Mitânguéra apytépe
Ndaipóri ha'eichagua
Hekoitépe omombe'úva
Opaichagua káso.
XV
Umíva apytépe
Oî ka'i, aguara,
Guasu pytâ'i, Peru
Pychâichi ha pombéro.
XVI
Ña Delia, ore sy
Omano rire
Pya'eteve ituja
Ko'áĝa ika'arúma
Sa'ietevéma oku'e.
XVII
Rasaite ipuku ko tape
Oipykúiva che ru
Upeichavérô jepe
Akóinte hetia'e.
XVIII
Rovy'aite heseve
Ta'yrakuéra roiméva
Ohechaukáre oréve
Ipotîva tape
Teko porâve rekávo.
XIX
Ipahaitépe iñemoñare
EmiliaAliciaFrancisco,
MartaPablinoAntonio
Ha José Benigno
Rome'ê chupe aguyje.
XX
Aguyje imborayhúre
Aguyje ore rekombo'ére
Aguyje heko marangatúre
Aguyje hetaite mba'e porâre
Ore ru "Karai Guasuete".
Aguyje
Pablino Gómez Vera
14/10/2016
ooo000ooo
ooo000ooo
Leer SE PRESENTÓ “LOS ÑE'ÊNGA EN LA CULTURA PARAGUAYA”, en (https://dgaleanolivera.wordpress.com/se-presento-el-libro-los-neeng...)
Blanca Lilia, Pablino ha Emilia Arami
Leer PRESENTAN ESCRITO EN GUARANI ANTE JUZGADO EN ARGENTINA – ULTIMA HORA, en (http://m.ultimahora.com/presentan-escrito-guarani-un-juzgado-argent...)
Ver ENTREVISTA A PABLINO GÓMEZ – PARAGUAY TV, en (https://www.youtube.com/watch?v=se-CRHe5zDo)
Ver FESTIVAL PÉICHA OPURAHÉI CHE RETÂ, en (https://www.youtube.com/watch?v=ZC55lGQZ12I)