miércoles, 24 de junio de 2015

TATA - FUEGO

TATA
Ohai: David Galeano Olivera
I
Kuarahy ojope
Oparupirei
Omyasãi tata
Ha upe ipytúpe
Ohovere, ohapy
Ohesy, omboyku
Opaite mba'e
Haperãme oĩva,
Tuicha ha michĩva
Hatã ha hu'ũva
Imbarete ha ikangýva
Ipohýi ha ivevúiva
Taha'e ha'éva
Oñesũpehẽ
Tata renondépe
Oĩgui ipype
Ñande Ru pytu.
II
Ndéniko Tata
Temimoĩ tuichavéva
Remoingovéva yvypóra
Nde pytu marangatúpe.
Nendive oĩ avei
Y, yvy ha yvytu
Irundyvéva mba’e
Pu’akavusu ruvicha.
Opavave jaikuaa
Nderehe'ỹ tata
Mba’eve ndoikóiha
Ndéniko ha’e
Ñande Ru pu’aka
Ñande Ru pytu
Tekove me’ẽha.
III
Nderehe oĩ
Mandu'a opaichagua
Akói reñemomorã
Araro’y oikekuévo.
Tapỹimimi oĩháicha
Rejope nde pytúpe
Ko’ẽ ha ka’arupytũ
Ojeguapy ndejerére
Ha ñomongeta kyre'ỹme
Remyendy jekupyty ha vy'a
Maymáva ñe'ãme
Ha ytakumi, kay’uhápe
Vevúi asy rembyaku
Opavave retepy.
IV
Huã Marangatu árape
Ha’éva nde rerekua
Mandu’a nderehe oiko
Ha nde rérape ojejapo
Vy'a guasu tuichaite.
Upépe ijatypaite
Mitã ha kakuaáva
Ha torýpe, torypápe
Heta oñembosarái.
Cháke ou tata
Cháke oho tata
Mitãmimi osapukái
Ha ñani sarakípe
Nderérape ovy'ajoa.
V
Oĩvoi he’iva’ekue
Chéngo ýpe pomongarai
Ha cheriregua katu
Tatápe penera’ãta,
Péva añoite ha’égui
Opaite teko ruvicha,
Karai marangatu
Hekove sakã jajáiva
Opaite mba'e apohare
Ha ndéko hína tata
Upe karai pytu,
Ipokatúpe reime
Tekove rembopyahu
Nde pytu marangatúpe
Ha, tata ndéko ha’e
Ñande Ru pu’aka
Ñande Ru pytu
Tekove me'ẽha.
Ta'ânga: ABC
ooo000ooo
Leer SAN JUAN ÁRA - EL DÍA DE SAN JUAN, en (http://cafehistoria.ning.com/profiles/blogs/san-juan-ara-el-dia-de-san)